政Whats噏:陸頌雄掌鐵路小組 開會少惹質疑

20191105
東網電視
更多新聞短片
陸頌雄(左)任鐵路事宜小組委員會主席,但畀議員話佢開會次數少。(溫國佳攝)
港鐵沙中線開通期一拖再拖,加上近期暴力示威者多次毀壞港鐵設施,搞到港鐵最近都提早收車,以便維修。鐵路事宜小組委員會今(5日)開會成功選到正副主席,分別由陸頌雄同陳恒鑌擔任,陸頌雄隨即安排開會時間,但被議員投訴一年得4次會完全唔夠,唔通陸想偷懶?
議員林卓廷話沙中線係焦點所在,到依家都未實行局部通車,工程質量、管理營運又出問題,先前紅磡站仲出事故添,希望安排多幾次會議,可以增加會議工作量又可以凸顯重要性。陸就叫林寫信申請,但希望先確定例會嘅日子,林就好激動話「同你講咪得囉,點解要寫信,都傻傻哋嘅」。
本來諗住建制派會幫手打圓場啦,點知議員柯創盛問鐵路何去何從,希望陸頌雄對政府「窮追猛打」,迫運房局交代沙中線問題。就連啱啱當選做副主席陳恒鑌都要求開會開密啲,以回應社會訴求。
陸頌雄回應話明白今屆鐵路事宜小組委員會有好多嘢要跟進,會盡量安排時間,包括加會或者加長會議時間,同時會迫港鐵、運房局交代相關事宜,例如要求政府畀時間表亦都會問沙中線獨立調查委員會拎報告。佢仲強調自己冇偷懶,每個委員會都跟機制運作,惟有喺機制外搵時間加會啦!