政Whats噏：何俊賢鬧爆暴徒　話香港跌入「量子騙局」

立法會今朝(21日)繼續討論休會待續議案，唔少建制派議員都借機炮轟現時「黑衣暴徒」對社會嘅破壞。有議員形容香港好似跌入咗「量子波動政治騙局」，呼籲政府要盡快拉倒犯罪集團！

漁農界立法會議員何俊賢發言時，首先提到早前有新聞報道內地嘅「量子波動速讀」騙局，交萬四蚊學費就可以容易啲搶到演唱會飛、買彩票會中獎，質疑咁嘅嘢都會有人信，佢就話現時香港嘅情況正正符合晒呢種騙局，只要有一大堆唔知咩嘅理論，當中加少少聽得明又好好聽嘅理論，再形容到可以從中得到巨大利益，就會有好多人信。佢仲叫香港政府應該要好似內地政府咁，要盡快拉倒依家嘅黑衫犯罪集團！

至於旅遊界議員姚思榮就陳列多項數據，指呢幾個月嘅示威由和平演變成暴力衝突後，旅客大跌超過40%，大幅影響本地酒店、食肆同零售商嘅生意，旅行社好大可能出現倒閉潮，姚不禁反問：「香港以往係世界最安全，但依家點啊？」

工程界議員盧偉國仲引用埋1982年電視劇，《飛越18層》嘅主題曲《難為正邪定分界》嚟形容啲暴徒。佢話呢首歌當年好流行，特別由魔鬼同凡人對唱，即使唔係歌迷都會好記得一句歌詞：「努力興建，盡情破壞，彼此也在捱，人間的好景給我一朝破壞。」盧話香港依家情況就係呢套電視劇嘅現實版，極端分子嘅暴力行徑日漸升級，又用汽油彈攻擊警察同途人，到處縱火，濫用私刑，依家仲破壞路軌，火燒活人。

盧偉國話雖然首歌叫《難為正邪定分界》，但其實電視劇入面對正邪嘅定義好清楚，現實都係，努力興建嘅凡人係正，盡情破壞嘅魔鬼係邪，形容暴徒就係魔鬼。