政Whats噏：陳凱欣問政府七大吉祥物去咗邊？

香港亂局爆發咗近6個月，政府被指冇用盡方法止暴制亂。立法會議員陳凱欣喺立法會大會發言時就批評政府喺網上宣傳平亂訊息不力，仲鬧政府點解無好好咁善用七大吉祥物，再嚟多次「跨部門合作」幫吓警隊！

陳指大家好熟悉嘅吉祥物包括任何仁、大嘥鬼、清潔龍阿德等，七個政府部門吉祥物曾經喺4月時無事無幹、無風無浪，食住一套電影嘅熱潮，約埋同一日換新相組成聯盟。「一個人嘅力量有限，但只要齊心，香港人就有無限動力。」陳仲引咗食環署「清潔龍阿德」當時所寫嘅說話，但就轟呢七隻吉祥物依家唔見晒！

陳仲話現時好似剩低警隊做緊嘢，但警隊無吉祥物，反問班吉祥物係咪全部同大嘥鬼嘅主人去行山？佢又鬧政府負責做宣傳嘅部門不單無好好利用吉祥物，目前宣傳反而似活喺平衡時空咁，好多政府廣告完全冇因應時局提供最新資訊。睇嚟政府要喺「關公問題」上給力！