政Whats噏：民主派怕內訌？傳油尖旺區會主席輪流做

喺今屆區議會選舉中，民主派取得逾300個議席，喺17區更加佔過半數議席，日前已傳出唔少民主派爭做區議會主席，而有指油尖旺區議會嘅民主派已有共識，計劃將會由2名區議員輪任主席一職，每人任期2年。

早前有指曾擔任葵青區議會主席嘅民主黨單仲偕建議，將主席任期由4年一屆改為2年一屆，隨後亦有其他嘅區議員都表態支持，例如大埔區。據了解，油尖旺區或會推行輪任區議會主席，有傳將由區內較資深嘅獨立民主派林健文同公民黨余德寶輪任。

有指林健文係因為本身律師工作，所以唔會做足4年，而余德寶就曾經喺Facebook上講過，有街坊鼓勵佢擔任主席一職。

至於其他區方面，東區區議員趙家賢亦係主席人選之一，但今日被問到主席傾向，佢就話所屬嘅民主黨唔會為搶位而搶位，希望可以盡力促進新任議員順利展開區議會嘅工作，仲話同新任議員集思廣益後先會決定人選。