政Whats噏:何君堯粗口文件惹禍 梁君彥遭泛民圍攻

2019年12月12日 13:54
東網電視
更多新聞短片
因何君堯粗口文件惹禍,梁君彥遭泛民議員追問。
立法會呢兩日辯論咗好多個譴責動議,話說今日(12日)辯論建制派議員何君堯動議譴責民主黨(白鴿黨)議員林卓廷嘅議案時,其中一個焦點落咗喺何向立法會遞交嘅文件,因為喺附錄部分有一啲粗口字眼,隨即9名泛民議員合共提出14輪規程問題,質疑主席梁君彥容許何喺正式文件加入相關字眼係咪合適,當中譚文豪更加五度發言追擊主席裁決添!
何君堯提交嗰份文件唔單止有粗口拼音「DLLM」同「DL」,更加有「X街」二字以至英文原句「Fxxk You」,當佢喺發言引述文件附錄上嘅內容時,直接講出「PK」等粗口諧音以至「X街」二字,被梁君彥裁定為非議會用語要求收回,雖然何表示收返相關字眼,但就為呢場攻防戰拉開咗戰幔。
譚文豪隨即提出規程問題,質疑點解粗口字句作為非議會用語,例如將「Fxxk」等粗口字眼直接加入到立法會正式文件中係咪合適?梁認為何只係喺份文件度覆述其他人嘅說話,指法庭文件做法一樣,而當有人喺議會用不恰當言語,主席必然會執行議事規則。
譚嘅黨友、陳淑莊亦提出規程問題追問主席,唔單止話正常翻譯無可能將「DLLM」4個字母翻譯成「Fxxk You」2個英文字,又提到早前主席裁決之後自己未聽到何有講到收返相關言論,梁君彥隨即指自己有聽到何有收返相關字眼,又提到呢份文件係喺秘書處通過咗。多名泛民議員繼續炮擊梁,當中譚指立法會文件會喺網上公開,有粗口字眼會影響議會形象,呼籲主席必須要作出處理。
攻防戰去到最後,梁君彥話會叫秘書處同法律顧問審視相關議題,仲叫泛民議員唔好過分解讀,之後就叫何君堯繼續呢段被打斷超過20分鐘嘅發言。
其實泛民同主席嘅交戰仲未完,工黨嘅張超雄喺之後發言時指何呢個議案係賊喊捉賊,仲教主席做嘢,話「如果我係你就唔會允許佢擺呢啲所謂嘅證據上嚟」。梁君彥即刻寸返轉頭,話「慶幸你唔係主席」,又話如果按主席喜好決定嘅話,好多嘢唔會上到嚟,仲話啲嘢根據議事規則係必須放上嚟,仲話主席裁決不容辯論添!