政Whats噏：長洲覆核王挑機　葉劉話歡迎提控

香港呢一個月嚟都比新冠肺炎籠罩，一班醫護之前就罷工抗議政府遲遲唔肯全面封關。身兼行會成員嘅葉劉淑儀月初嗰時喺佢Facebook帳號呼籲，受醫護罷工影響嘅病人可以同佢聯絡，話佢嘅法律團隊會為佢哋提供義務法律諮詢服務同研究向工會進行民事索償咁話。

葉劉今日(20日)再喺Facebook出Post，話之前收到人稱「長洲覆核王」嘅郭卓堅出信比佢同醫管局主席范鴻齡，內容大約話如果任何主要官員或行政會議成員採取打壓、煽動他人對合法罷工嘅醫護提出訴訟嘅話，佢一定會JR(司法覆核)咁話。

葉劉又喺個Post入面反擊話，「幫受醫護罷工影響病人苦主申訴，協助他們尋求法律意見喺(係)天經地義」，又揚言：「如果郭先生認為咁樣都構成所謂『打壓、煽動他人提出訴訟』，我歡迎他(郭卓堅)立即向法庭提呈司法覆核，睇吓法庭對他濫用司法資源及程序有咩反應。」