政Whats噏：麥美娟又鬧人？　原因係......

各政黨紛紛發表對財政預算案嘅意見，議員麥美娟竟然愈講愈激動，仲突然大聲話要講「4個字」，搞到唔少人以為佢又要鬧人添！

政府決定向18歲以上嘅永久性居民派發1萬港元。麥就話派錢好，但唔好重現派4000蚊嘅混亂情況，仲愈講愈火，突然話要講「4個字」。議員何啟明坐喺麥隔離以為佢要發火啦，但點知麥話「快啲派錢」，搞到何啟明即刻笑咗出嚟，仲話「以為(麥美娟)發火添！」

事後我哋問返何，佢話唔少政黨早前都呼籲政府全民派錢，但泛民主派議員就「老屈」建制派唔贊成政府派錢。雖然佢事後對街坊解釋話係「老屈」，市民似乎唔接受喎，呢兩日仲係咁打電話向佢哋呻。何話麥一直「有啖氣」，所以先以為麥要大鬧泛民，但點知「會錯意」。事件證明，麥美娟喺自己人眼中，惡起上嚟唔係人咁品囉！