政Whats噏：曾蔭權獄中求主憐憫　洗廁所亦分秒唸經

前特首曾蔭權爵士任內漏報利益，被裁定公職人員行為失當罪成而被判囚20個月，成為香港首位淪為階下囚嘅特首，今日(22日)佢接受天主教機構「生命恩泉」訪問，佢自爆原來喺獄中即使係洗廁所同埋清潔地方嘅時間，佢都會每分每秒唸住經，祈求耶穌憐憫。

本身係天主教徒嘅曾蔭權喺訪問入面主要都係講自己嘅信仰，反而冇講到最近新冠肺炎嘅疫情同埋依家政府嘅施政表現。佢話，坐監期間，好多朋友都寄一啲哲學同埋宗教書籍畀佢，佢愈睇愈有興趣，不過有好多位都唔太明。好彩陳志明神父當時每星期都去探佢監，同佢討論信仰問題，陳又叫佢，「一定要學做聖人」，做人先會開心，可以同天主更加接近。

回想每日喺咁細嘅囚房入面，佢除咗做柔軟操之外就係讀經，佢有時會默想一啲聖人嘅事迹。佢話佢太太試過諗起一個聖人唸經時，就會搵番唔見咗嘅嘢，非常神奇。