政Whats噏:小學生嗌錯方國「冊」 哪吒暗寸普教中教壞學生

20200704
東網電視
更多新聞短片
方國珊自爆變咗方國「冊」,唔知好嬲定好笑。
「普教中」喺香港都推咗10幾年喇,一直都遭人狠批,話教到依家啲小朋友中文程度不倫不類。西貢區區議員方國珊(哪吒)尋日都忍唔住係Facebook出貼,暗寸「普教中」教壞學生,令到佢哋中文水平愈嚟愈差。
事緣哪吒係貼文入面自嘲,話近排有個新花名叫方國「冊」。點解咁講?皆因哪吒最近同個小五學生傾偈,問個學生知唔知佢叫咩名?咁個學生就話知道,仲一口答咗方國「冊」。呢件事令哪吒唔知好嬲定好笑,雖然都知個小學生冇心講錯,但就令佢不禁思考點解依家啲小學生中文水平咁低?
哪吒就將矛頭直指「普教中」,覺得港人母語始終係廣東話,學生面對唔熟悉嘅語言自然興趣減低、不利於學習;又話依家嘅中學生連古詩文都未接觸過,有日喺街聽到小朋友將雪糕講成「冰淇淋」、番茄講成「西紅柿」、銀包讀成「錢包」等,反問「普教中」孰好孰壞?