政Whats噏：郭榮鏗被DQ參選立會後　房委會職務自己「搣柴」

政府早前宣布押後立法會選舉，但喺宣布前夕就大規模咁取消12個民主派人士嘅參選資格（DQ），有4個競逐連任嘅立法會議員都榜上有名，公民黨法律界議員郭榮鏗係其中之一。據悉，郭榮鏗喺上月底辭任房屋委員會委員，生效日期正正就係上月31日，即係被DQ後翌日。不論房委會同郭榮鏗都冇講過辭任原因。郭點解自己「搣柴」？以時間上湊巧到咁，似乎答案都好明顯喇！

自2012年起就擔任法律界議員，近呢1至2年直頭是非多籮籮，唔止捲入大規模DQ風波，自舊年立法會復會開始起計大半年，就被指多次利用內務委員會副主席負責主持會議嘅身份，阻撓內委會主席選舉，搞到內委會嚴重停擺成7個月，積壓咗大量法案同埋附屬法例，建制派同政府猛烈批評佢阻撓內委會選主席，甚至指佢涉嫌公職人員行為失當添！

唔止咁，過去郭榮鏗頻頻聯同有「民主阿婆」之稱的前政務司司長陳方安生等人外訪，包括去美國同德國等地「唱衰香港」，及後民主阿婆更被內地官媒炮轟為「叛國禍港四人幫」之一。

而喺內會風波過後，政府喺今年4月公布競爭事務委員會嘅新委員名單時，喺2018年獲委任做委員嘅郭榮鏗，當時就被告知不獲續任，當年同佢一齊被委任嘅委員，就有得繼續留低。雖然冇講點解被踢嘅原因，不過正正喺內會風波後就被踢走，相信原因都呼之欲出喇！

講返房委會，郭榮鏗喺2015年起就獲委任為房委會成員，一直都獲續任，喺上年獲續任後，原定任期由上年4月1日開始，直至明年3月31日。唔單止房委會成員，佢原本都係策劃小組委員會委員同埋建築小組委員會主席，依家就一次過辭任晒。而郭對呢件事冇回應。據了解，佢辭任房委會後，就再冇其他公職。

今次郭榮鏗喺房委會自我搣柴，時間上喺正DQ風波過後，好難唔令人聯想2件事有關連，莫非佢真係意興闌珊，所以索性自行了斷，好過遲啲又畀人踢走？