政Whats噏：林卓廷還押期間辭任北區區議員　已關閉所有辦事處

因參與「35+」民主派初選而被還押嘅立法會前議員林卓廷，喺3月31日宣布辭任北區區議員，並於當日生效。最新公布佢嘅所有辦事處已經正式關閉，議員助理都無工開，睇嚟林卓廷日後都只係得返網上呢個平台喇。

林卓廷嘅社交網站專頁仍然由前議員助理持續更新，喺尋日(9日)發文話自從林卓廷辭職，好多街坊都問仲有邊個代升斗小民發聲喎？不過基於政治現實，眼見香港急速淪陷，「代議士」係由一小撮掌權嘅人定義，令區議會被民政事務處等部門夾攻，而分區委員會就被建制派分豬肉。相信政府會繼續針對唔合心意嘅區議員，取消佢哋嘅議員資格，民主派可能再冇官方地位進行議政咁話喎。

貼文中又提到林卓廷由雙料議員變成「雙失囚徒」，佢嘅全部辦事處已經喺尋日正式關閉。不過又話「服務不圓滿結束、有緣再聚」，仲會繼續喺社交平台更新狀況喎，睇嚟佢真係「死唔斷氣」喇。