政Whats噏：嬰兒、新生代基金議案同遭否決　蔣麗芸促政府再考慮　

跨代貧窮問題阻礙基層青年向上流動，議員蔣麗芸（Ann）今日(13日)提出無約束力議案建議政府設立「新生代基金」，協助香港新生代籌劃未來。不過，有議員憂慮設立「新生代基金」後，受惠嘅係中介人，又認為青少年欠缺上流動力，教育問題令下一代只懂得埋怨政府及社會，議案最終被否決。其實阿Ann喺4年前已經曾經提出過類似嘅嬰兒基金，但都係被否決。兩個議案都過唔到關，以後仲提唔提呢？

阿Ann喺2017年曾提出設立「嬰兒基金」，要求政府與家長進行配對供款，供青年讀書或置業。不過當時就畀其他議員指已經有同類的兒童發展基金，再設「嬰兒基金」是多此一舉，議案最後被否決。Ann姐話事隔數年，留意到有青少年因蠅頭小利而犯法，又有貧窮小朋友認為前途暗淡，認為是適當時間檢視長遠政策協助新一代。佢指加拿大、英國及新加坡有相類協助兒童發展的基金，建議政府考慮為每位18歲以下兒童設立戶口，每年由政府與家長以比例配對方式，共同存入一筆金額至兒童成年，但不會強制家長供款，強調此非派錢方案，而是解決現存社會問題的長遠方案。

但身為母親嘅議員梁美芬就憂慮設「新生代基金」後，受惠嘅係俗稱「基金佬」嘅中介人。佢又形容現今好多年輕人無夢想，源於成長期間被家長過度安排，成年後即使面對機遇都唔識把握，又批評本港教育有好大問題，令下一代淨係識得埋怨政府、社會同家長，但自身就欠缺向上流嘅動力。

勞工及福利局局長羅致光就話，議員提出的基金為所有兒童而設，認為應該確保緊絀的公共資源用於有需要人士，例如院舍或幼兒服務中心，政府日後亦會繼續針對性扶助有需要人士。

議案最終喺分組點票下被否決，而阿Ann話已用盡咗自己呢屆可以提無約束力議案嘅次數，所以短期內都唔會再提交到立法會。但佢始終相信呢個係一個對下一代好嘅政策，可能未來會係施政報告前再重提建議，都會再叫下屆政府考慮下。佢話如過政府點都唔考慮建議都無辦法，不過身為議員叫做有努力過囉！