政Whats噏：東區下月補選主席　泛民建制人數平手或需抽籤

早前政府要求區議員宣誓，跟住就傳出違誓追薪加辣方案，令到原本由泛民主導嘅17區區議會爆發辭職潮，就連正、副主席都掛冠而去，以致多區出現形勢逆轉，由建制派取得主導權。東區區議會下月12號召開大會，屆時將補選正、副主席，由於該區現時只係得番6名區議員，泛民同建制各佔一半，若然雙方都派人角逐，喺唔走票嘅情況下，正、副主席職位可能需抽籤決定花落誰家。

觀塘區議會本月初補選，建制陣營嘅議員柯創盛接任區議會主席一職，喺東區，建制派議員郭偉强會唔會有意倣效呢？佢就話依家時間尚早，自己尚未考慮會否角逐主席一職，況且同區嘅建制派區議員之間仲未商討補選事宜。至於另一建制派區議員李清霞，就話嚟緊會坐埋一齊商量，直言如果有機會，佢都樂意肩負主席職責，因為始終覺得民生係重要一環，特別係早排當區區議會因人數不足開唔到會，都想盡快回復正常。而當區建制派區議員阮建中就話，自己對於角逐正、副主席一事唔會強求，但其實當區都只係得番幾位建制派區議員，如果有需要嘅話，佢都願意接掌主席職務。

當區剩低嘅泛民區議員就係仇栩欣、周卓奇同埋梁詠詩，佢哋並冇回覆係咪有意角逐正、副主席。東區區議會兩邊陣營打成平手下，如果兩邊都派人出選，同時又唔走票，開得成會嘅話，有機會靠抽籤決定邊個可以出任正、副主席。大埔區議會早前正正出現呢個情況，兩名泛民區議員毛家俊同陳振哲競逐主席，選舉喺兩輪投票都打成平手，最終毛家俊喺抽籤下當選。

不過參考其他區，都有唔同應對策略㗎，例如葵青區因區議會主席梁錦威正被還押，另一名民主派區議員郭子健有傳身處海外，令到可出席會議嘅泛民同建制人數一樣。全部5名建制派區議員就選擇缺席上次大會，部分人解釋喺未明確區議員愛國者身份，就倉卒選副主席並唔係為民上策。但另有一種睇法就係建制派擔心抽籤落敗，倒不如拖住先，待區議員宣誓有幾多個泛民過唔到關。而喺屯門區，儘管仍然由泛民佔優，不過最近嘅特別會議同埋大會接連因為人數不足流會，到依家都未能補選主席啊。