政Whats噏：立會改裝會議室　加設座位　作公開會議用途

今屆立法會議員人數由70人增加至90人，立法會綜合大樓都要進行各類改建及加設座位工程，以應付大幅增加嘅人數及會議需要。其中，喺大樓2樓、原本只設有一張大圓枱嘅會議室4，就正改裝為公開會議場地。之不過，原訂上年底完工，但到依家都未完成整個工程喎。

翻查立法會相集，會議室4房中只擺放一張橢圓大枱，原本並非用於舉行公開會議。而按現場所見，改裝後會增設31個議員及官員座位，另外亦在房外加設一道門，通往新設嘅攝影房，地下就會再鋪設地氈。

至於牆上一大幅畫作亦被換走，搖身一變為立法會標誌及大樓外形圖案。之不過，相比其他會議室，由於會議室4本身空間較細，所以加設枱櫈後，感覺上都較為壓迫。