政Whats噏：郭天立前議辦轉型做雜貨店　經營困難月底結業

提早離任或遭政府DQ嘅前區議員，既要面對自己嘅出路問題，亦要想方法處置其議員辦公室。去年離港嘅九龍城前區議員郭天立，其位於紅磡嘅議辦就改為雜貨舖，然而經營僅僅半年，今個月尾就要結業，將舖位交還業主。

因宣誓不被確認，遭政府褫奪議席同追討營運開支嘅郭天立，去年11月「輕輕的我走了」之後，其議辦嘅團隊就接手舖位，以士多、購物平台嘅形式繼續營運，主要係售賣香港生產嘅消費品，冀藉此振興本土文化咁話。郭天立人在海外，間中都會透過社交平台呼籲街坊多多支持。之不過，打理雜貨店嘅所謂「團隊」，主要係郭嘅兩位前助理，都係社會經驗唔多嘅年輕人，雖則抱住見步行步嘅心態去經營，然而疫情重創消費巿道，又要應付高昂嘅舖租，最終都係做唔掂，宣布本月29日關門大吉。

除咗郭天立，油尖旺前區議員林兆彬去年7月辭職後，亦將其議辦改為零售店，但經營只得3個月就宣布執笠。