政Whats噏:白鴿黨財困 復辦籌款晚宴撲水

20220514
東網電視
更多新聞短片
白鴿黨將復辦籌款晚宴。
近年陷入財困嘅民主黨(白鴿黨),因疫情關係已連續2年停辦嘅黨慶暨籌款晚宴,有望今年將復辦,並已敲定7月中舉行。之不過,今次晚宴並非以「黨慶」嘅名義,而係類似春茗咁嘅聚會,且受限於防疫措施,規模唔會好似往年「咁大場面」,實際賓客人數視乎政府防疫措施限制,估計100至200人左右。
其實白鴿黨喺去年就已經話將會出現逾百萬元嘅財赤,如果現金流捱唔到去今年年尾,恐怕難以維持地區工作,以致近期黨內決定縮減人手、賣黨車甚至開設網店出售紀念品救亡,以應付日常營運開支。現時要復辦籌款晚會撲水,但最終能夠緩解財困,咁就不得而知啦。
另外,該黨前議員涂謹申賣樓套現。根據資料,北角丹拿花園1座低層D室,實用面積815平方呎,屬於3房間隔,原本叫價1300萬元放盤,上月底以1123萬元沽出,比銀行網上估價1218萬元低約95萬元。該單位為涂謹申夫婦於2010年購入,當時造價582萬元,持貨至今12年帳面獲利541萬元,期內升值93%。而涂曾參與民主派35+初選,被警方國安處已涉嫌違反港區國安法被捕,但未有被起訴,並獲准保釋。