政Whats噏:停練7個月 江玉歡重投鋼管舞室

2022年05月14日 16:30
東網電視
更多新聞短片
江玉歡(左)重拾興趣,上堂學習鋼管舞。
要保持窈窕身材,除咗勤做帶氧運動,跳舞都係一個好方法。議員江玉歡(Doreen)今日(14日)上載佢喺鋼管舞室嘅相片至社交網站,但見攀上鋼管嘅佢,向橫伸腿懸停半空,動作相當嫻熟。但其實Doreen已經有一段時間無去練舞,話若果繼續疏於練習,擔心舞姿動作會變得生硬。
其實除咗鋼管舞,Doreen仲識得跳探戈。話說多年前Doreen見某影星跳拉丁舞相當有型,於是佢就跟隨一位東歐女老師學習探戈。Doreen認為動作明快且講求高度默契嘅探戈舞,的確悅目,但前提係必需兩人共舞,然而遺憾的是,好難搵到男舞伴,以致Doreen經常要充當男角。佢話有一年嘅生日聚會,同跳舞女友人於席上表演探戈獻藝,當時佢就要穿起西裝蓄起頭髮,女扮男裝。
雖則Doreen唔介意扮男人,之不過同探戈相比,鋼管舞可免除搵舞伴嘅煩惱;況且佢睇過一段短片,講述年屆花甲嘅女士勤練鋼管舞且奪得國際賽大獎,感覺非常勵志,於是佢就拜師學藝。學習鋼管舞兩年嘅Doreen發覺肌肉結實咗,又改善身體柔軟度,深感鋼管舞受女士歡迎嘅程度,有勝過瑜伽之勢。但由於7個月前Doreen需應付選舉工程,暫停習舞,直至今日先至再踏鋼管舞室,同舞蹈老師重聚。佢話議會工作即使繁忙,亦會堅持每星期至少一堂鋼管舞蹈課。