政Whats噏：擬增助理市政署長職位　蘇長榮鬧康文署未瞓醒

雖然政府講過首長級零增長，但亦話有需要就會開位。話說喺立法會一個委員會上討論開會，有議員就好唔滿意。

話說立法會民政及文化體育事務委員會今日(12日)開會討論康樂及文化事務署開設一個助理市政署長常額職位，呢個職位每年連埋福利都要洗約三百一十萬港元，職務包括制定落實「十年文化藝術設施發展藍圖」、配合政府打造香港作為藝術科技重鎮嘅發展策略。文化體育及旅遊局副局長劉震仲話康文署自2000年之後，署長級職位嘅人數冇變過，而康文署有大概1萬人，只有12位署長級職位。

議員蘇長榮話康文署好似「未訓醒」，因為呢啲嘢之前康文署都做緊，劉震就話以後呢啲範疇嘅工作量都會增大，跟住佢就每個範疇都解釋下要做咩，蘇長榮就打斷佢話「唔好當我幼稚園」、「唔好答得咁寬泛」，之後劉震就回應新嘅助理署長仲要同其他助理署長協調，而新嘅助理署長要加強領導角色。