政Whats噏：天氣超凍　還押范國威着9件衫冚兩張氈

呢幾日凍冰冰，尋日(18日)更錄得最低氣溫9.4度，雖然係咁，世界盃都打得火熱。社福界前議員邵家臻周不時都會探下在囚嘅朋友，佢今日（19日）就去荔枝角收押所探涉民主派初選案而被還押嘅前議員范國威，佢哋竟然唔講波，反而講天氣喎。點解呢？

原來係范國威話今年比舊年凍好多，事關舊年最冷係12度，今年就得翻9度，佢話自己將所有嘅9件衫都着晒上身，連懲教署都提供多兩張氈畀佢哋禦寒。天氣咁凍，佢千叮萬囑要邵家臻保重身體、定時檢查。

邵家臻形容范國威「死唔斷氣」，因為講完身體，范就不斷講電影，例如近排大熱嘅《正義迴廊 》、《阿凡達：水之道》，雖然世界盃近排都係大熱話題，但范就唔關注邊隊贏，反而就話今屆世界盃主辦方為咗興建多個比賽球場而有足足6500名農民工過身，邵最後就話要畀啲掌聲范，因為范同佢上咗堂人文美術史課咁話喎。