政Whats噏：易志明首開地辦　頭炮講的士調整收費

以往立法會功能界別嘅議員，好少喺地區開議員辦事處，但今年唔少功能界別嘅議員都開設地辦，而最近又多咗一個。究竟係邊個呢，又開喺邊度呢？

話說航運交通界別議員易志明，近日就夾埋屬友、灣仔區區議會副主席林偉文一齊喺灣仔開地區辦事處，呢個亦都係易志明首個地區辦事處。林偉文話佢哋之所以會一齊開地辦，一嚟係因為係黨友，二嚟係灣仔區嘅地理位置比較好係交通樞紐之一，亦都有唔少交通業界嘅總部，好啱交通界別嘅易志明，所以兩個人就係灣仔設地辦咁喎。

林偉文又透露，未來佢就主要處理地區問題，而易就會着手處理返交通事務。實際上，佢哋近期都有協助一啲的士業界就價格調整方案做研究，仲話過多一兩星期可能會有進一步嘅消息公布。