政Whats噏：不忿英方撤邀請　李梓敬簡慧敏另起爐灶

議員李梓敬同簡慧敏原獲安排下個月前住英國，出席由英國議會及英聯邦議會聯合會合辦嘅西敏寺研討會（Westminster Seminar），點知對方喺上個月撤回邀請。唔知係咪因為唔忿氣，佢哋就話既然人哋唔邀請，就決定喺今個禮拜五舉辦一場佢哋專屬嘅座談會，仲話要用英文進行添！

就英方撤回邀請，早前李梓敬強烈譴責，形容係抹黑香港制度，所以今次要聯同另一個原可赴英嘅議員簡慧敏，一齊擔任座談會主持，希望用英文向國際講解香港議會制度嘅今昔。

呢個佢哋專屬嘅座談會不但舉辦地方、時間變咗喺本地進行之外，連人數都變埋。李梓敬邀請埋葉劉淑儀、周浩鼎、陳穎欣等議員，又邀請港區人大代表譚惠珠等人參與，聲言要一齊說好故事咁話喎！