政Whats噏：連走4場撐食肆　張宇人嘅7.1減肥餐單係...

近1500間食肆今日(1日)部分指定菜式或餐飲品畀71折，作為飲食界議員嘅張宇人朝早已經走咗幾場，但喺社交平台仲話係佢嘅「7.1」減肥餐單。唔係啩！

飲食業界話今次提供優惠係豁出去。張宇人亦喺貼文中話要身體力行去支持食肆呢個大行動。佢朝早同幾位副司長去酒樓飲早茶、午餐去咗食粟米肉粒飯，而甜品就係酥皮蛋撻，下午茶就去咗另一間食菠蘿批。至於晚餐就有啲「反高潮」，佢話太飽啦！雖則胃納有限，但都食咗兩個沙翁。

果然係一日食足4餐加甜品，咁仲叫減肥餐單？抑或佢覺得食咗咁多，又走勻咁多食肆，體力消耗比吸收更大呀？