華倫奪冠 標準流浪做阿二唔失禮

周三晚由西甲雙雄華倫西亞、維拉利爾及港甲標準流浪假旺角場互撼的「LFP全球挑戰賽亞洲站(香港)」，華倫西亞憑住歐霸盃射手柏高艾卡沙連續兩場有士哥，帶領「蝙蝠兵團」以全勝姿態奪冠；至於主隊標準流浪則以一和一負（2入球)得3分成為賽事亞軍，亦算有交代。

這次3角賽賽制特別，每仗只踢45分鐘，贏波3分，和波1分，每入1球加1分。難得西甲雙雄來港比賽，昨晚有超過3700名球迷入場睇波，頭場先由主隊標準流浪火併華倫西亞，開波冇耐「蝙蝠兵團」即搶攻，先有阿拉烏蘇無人看管下近門頂高，去到16分鐘，米高米基爾罰球斬入禁區以為漏晒，冷不提防中堅域陀雷斯竟殺到左路底線傳中，阿拉烏蘇今次冇甩拖頂成1比0。

陷於苦戰的流浪，37分鐘靠一次突襲意外偷到雞，奧斯加接應角球勁頂直飛死角，華倫球員桑班列特伸盡腳想解圍亦欲救無從。不過華倫換入柏利祖及柏高艾卡沙即有貨交，前者於45分鐘勁射省中劉松偉再度領先，加上柏高艾卡沙轟入世界波，助「蝙蝠兵團」輕取3比1。

第二場輪到兩支西甲勁旅正面交鋒，明顯緊湊得多，華倫中場米高米基爾轉身窩利抽射，眼看必入之際，竟被「黃色潛水艇」維拉利爾門將桑卡路士神勇托出，之後「黃色潛水艇」中場祖安羅曼於禁區內舞龍咁舞勁射被救出，26分鐘這名小將再妙傳莊拿芬彭利拿，可惜後者失諸交臂。34分鐘華倫前鋒柏高艾卡沙快速殺入禁區遭加拿斯剷跌，球證直指12碼兼出示紅牌趕加拿斯出場，柏高艾卡沙親自操刀一針見血，這位今屆歐霸盃次席射手連續兩場有士哥，帶領球隊小勝1比0。

雖然奪冠機會渺茫，不過維拉利爾與流浪於尾場亦冇揸流攤，「黃色潛水艇」僅兩分鐘先由柏保路干沙利斯打開紀錄，25分鐘輪到流浪的林學曦瀟灑地後踭扳平，最終雙方各一言和，由於華倫西亞全勝兼轟入4球，令該隊以10分力壓其餘兩隊捧盃。

賽後，標準流浪奪亞功臣之一的林學曦，自評自己在賽事中的表現值80分，由於賽事於西班牙有直播，故希望自己的表現可吸引到球探，再次獲得外闖的機會。

●LFP全球挑戰賽亞洲站(香港)積分表●

球隊 勝 和 負 得球 分

華倫西亞 2 0 0 4 10

標準流浪 0 1 1 2 3

維拉利爾 0 1 1 1 2