英超Fever：恭喜車仔成為英超王者！

英超「一哥」車路士憑夏薩特一箭定江山，喺主場以1比0小勝水晶宮，順利提早3輪重奪失落4季嘅聯賽錦標，亦係「寸王」教頭莫連奴第3度稱霸英超，認真威水。

賽前剩番4輪之下，榜首車仔已經領先次席曼城13分，只要今仗贏波便可提早奪冠，佢哋先有老將杜奧巴妙射「落葉」罰球，搞到水晶宮門將史巴朗尼倒瀉籮蟹，完半場前夏薩特殺入禁區遭對方撞跌博到12碼，並親自操刀雖畀史巴朗尼捉到路救出，但呢位應屆英格蘭球員先生衝前頭槌補中，為車仔打破僵局。

車仔主帥「寸王」莫連奴易邊後換入約翰米基爾加強防守，最終成功守住1比0勝果，唔單止重奪失落4季嘅聯賽冠軍，亦係上季回巢嘅莫帥繼05及06年之後，第3度揸「車」稱霸英超，對「寸王」嚟講意義極大，抵佢咁招積！連同之前取得嘅聯賽盃冠軍，車仔成為英超雙冠王，堅威水呀！

車路士隊長泰利今季打足所有聯賽，佢賽後受訪時梗係開心啦，但都不忘安慰啱啱經歷喪妻之痛嘅里奧費迪南，兩條友關係一向麻麻，泰利呢次真係加晒分。至於車仔老牌射手杜奧巴就表示：「呢間球會有冇我在陣都係咁特別，我真係好鍾意喺度踢波呀！」一眾球星賽後喺更衣室開晒香檳慶祝，氣氛正到爆呀！今季佢哋表示平穩，悶咪悶囉，確係抵贏冠軍喎！