歐聯　美斯射爆剋星！巴塞決賽在望！

球王係得嘅！歐聯4強巴塞對拜仁首回合，巴塞喺主場出擊，面對熟晒自己路數嘅拜仁大軍，雙方大部份時間都陷於拉踞局面，好彩「地上最強」喺關鍵時刻有球王美斯打救，由77分鐘起4分鐘內梅開二度，打破佢三鬥紐亞冇波入宿命，再加上佢補時階段靚助攻尼馬入波，巴塞最後埋單贏夠3比0，半隻腳踩入決賽呀！

兩班波都係大打控球在腳戰術，尤其係拜仁主帥哥迪奧拿更係巴塞前教頭，兩軍波路接近，上半場都係互有攻守，形勢均等。巴塞早段係先有幾次入球黃金機會，可惜係蘇亞雷斯兩次單刀都逃唔過拜仁門神紐亞十指關。

拜仁喺18分鐘幾乎先拔頭籌，羅拔利雲度夫斯基接應隊友湯馬士梅拿傳中，後上離門8碼無人看管剷射，無奈食唔應斜出。之後到36分鐘，美斯罰球又一次畀紐亞沒收，半場雙方互交白卷。

換邊後形勢繼續拉踞，71分鐘，拜仁中場倒戈嘅堤亞高艾簡達拿一記25碼遠射，省中人改變方向，繼續收死達史特根。6分鐘後，球王終於發功，丹尼爾先喺前場右路截得拜仁守將腳下球，再擺脫二人傳中，美斯禁區一控即時割草式勁射近柱死角入網，終為巴塞打破缺口。

80分鐘，美斯接應拿傑迪錫妙傳殺入禁區，扭過謝路美保定後，冷靜笠射入網，巴塞贏到2比0。之後拜仁換入馬里奧葛斯全力反擊，可惜未能追近之餘，去到補時3分鐘，美斯喺中場直線妙傳尼馬，後者單刀冷靜射入，終為巴塞鎖定3比0勝局完場，拜仁要次回合反勝，似乎要寄望奇迹！