馬德里網賽　巨人殺手做低費達拿喎！

上星期先贏完土耳其網賽嘅瑞士網球天王費達拿，今個星期轉戰馬德里大師賽，估唔到打到第二圈就出局。「費天王」今晨面對住舊年曾經喺溫布頓踢走拿度嘅澳洲新星基治奧斯，激戰接近2小時30分鐘後，終以7比6(7比2)、6比7(5比7)及6比7(12比14)不敵落敗。基治奧斯今仗表現精彩，全場開出22個「A士」，相比起費達拿嘅15個「A士」，明顯佔優，呢位澳洲天才晉級之後，下圈將會硬撼美國巨人伊士拿。