香港隊　不丹=食KFC慶功的地上最屎球隊

香港於世盃外亞洲區賽事面對不丹，呢支南亞球隊喺今年3月份世界排名209位，被視為地上最屎球隊。不過，佢哋爆出驚天冷門喺世盃外首圈主、客雙殺斯里蘭卡，真係超經典！而更精彩嘅係佢哋首回合贏波後食KFC慶功，成為全球球壇熱話，佢哋嘅故事確係夠晒傳奇！

不丹喺1982年踢首場正式國際賽，當時作客尼泊爾輸1比3，佢哋2000年對住科威特輸到大大鑊，淨吞廿蛋創下國家隊史上最大敗仗！等足廿年，不丹終於喺2002年錄得第一場勝利，當年場波精彩喇，不丹排202(尾二)，對手係包尾嘅英屬加勒比海島國蒙塞拉特，最終不丹大勝4比0，勁叻仔！而呢場波最後更被拍成記錄片《The Other Final》，意指當年世盃王者戰巴西對德國以外另一場決賽，堅經典！

不丹之後足運發展停滯不前，愈來愈頹，面對斯里蘭卡賽前排緊209位包艇！喺首回合賽前，全世界都睇好斯里蘭卡可於主場輕鬆大勝，點知踢到84分鐘畀不丹巴打多治一箭定江山，跌到一地眼鏡碎！最正係佢哋賽後被影到去食KFC慶功，呢個國家曾經係「世界上最快樂的國家」，原來開心真係好簡單！

老老實實，不丹人口只得70零萬，本身並冇職業球員，國民又唔係特別熱愛足球，足運發展條件真係好惡劣，喺資源不足情況下打到入世盃外次圈，已經係超額完成。各位港隊支持者，今日入場支持港隊之餘，記住唔好錫力，齊齊畀啲掌聲鼓勵呢支曾經被笑係地上最屎嘅球隊喇！