港超聯　李志豪：我簽咗標準流浪啦！

上季後不獲東方留用的本地名將李志豪「虎哥」，因在香港隊主場2比0擊敗馬爾代夫的世界盃外圍賽中，表現出色、攻守兼備，致其名字一度與多支爭標分子，扯上關係。但至本月中列強先後開操，都未見「虎哥」的蹤影，原來:「我簽咗標準流浪啦！」李志豪謂。

上月中，記者曾相約「虎哥」用膳，當時他還叫球迷們不用擔心他：「我OK，大家放心喎！」並謂相信自己的水準保持到，深信會有球會懂得欣賞他，不擔心「無班落」影響其繼續獲港隊徵召的機會。但原來自信心十足的「志豪」，也曾一度為前途擔心過，他謂：「初頭真係好有信心，喺香港隊場波自己表現OK，加上有幾位球圈好友為我搭路，諗住應該冇問題啦！點知之後出現咗啲變化，等吓等吓得番個等字，令我一度好認真咁去為退役打算。」李志豪憶述期間，不忘向幾位曾出手相助的圈中好友，以及一路十分支持他的球迷道謝。

直至本月中，「懂得欣賞他」的球會終於出現，李志豪表示：「我等極都未有消息，有日『加菲貓』（即標準流浪總監李輝立）打嚟問我點，約我食飯，仲叫我去佢哋度練吓波，Keep吓啲狀態。我見無嘢做，咪去操吓囉！操咗幾日，佢問我有無興趣傾吓踢流浪，佢好有誠意，畀我嘅條件亦唔錯，就係咁我簽咗喇！」

過去在港効力南華和東方的「志豪」表示，雖然標準流浪並非爭霸分子，但會長莫耀強很熱愛足球，大部分管理層都與他相識多年，球會會所設備亦很好，深信自己作了正確的決定。「我11月就33歲，標流肯簽我好開心，能夠有班落等港隊可以繼續選我，更開心！」說罷，「虎哥」露出久了未展現的笑容。