莎賓娜BB要轉行！打波日子唔多喇！

好掛住莎賓娜BB呀！擁有「12頭身」再加47吋長腿，哈薩克「排球女神」莎賓娜，真係迷死好多巴打！唔知佢最近點呢？咩話？冇見一排，莎賓娜BB走去從政？唔係嘛，18歲咁快從政？

莎賓娜BB獲任命成為國內婦女委員會成員(全名：婦女事務和家庭人口委員會)，致力保障哈薩克各行業女性嘅正當權益。非常愛國嘅莎賓娜BB，趁機表明自己一直立志為國家貢獻嘅決心，今次終於可以達成心願，咁識講嘢，將來肯定平步青雲！

至於球迷最關心，都係將來有冇得睇佢打排球，莎賓娜BB對此都回答得相當巧妙，仲叻女到拉埋哈薩克總統一齊講！「總統(納扎爾巴耶夫)希望我唔好放棄體育事業，堅持夢想，唔使在意啲麻甩佬嘅評論！我覺得總統真係好charm，好親切！」莎賓娜BB咁熱愛排球，實會聽總統話繼續打嘅，巴打們唔使騰啦！

正所謂「不招人妒是庸才」，莎賓娜BB有幾索，就唔使多講喇，索到連娛樂圈都mark到實就知啦，早前仲傳過因為莎賓娜太靚畀隊友排擠，但莎賓娜BB依然堅守原則，繼續專心排球事業！依家再以18歲之齡，鋪路進軍政壇，前途確實無可限量！

其實運動員從政，又唔係稀奇新鮮事。好似菲律賓拳王帕克奧係國會議員、華裔花滑冰后關穎珊退役後致力從政，最近更獲希拉妮招攬入助選團、前AC球星卡拿迪斯收山後成為格魯吉亞副總理、舒夫真高退役後被任命為烏克蘭國家養老基金主席、俄羅斯體操名將卡巴耶娃，退役後成為俄羅斯國會下議院議員等等...不過好似莎賓娜，18歲就有一官半職，認真少見！