歐國外　冇嘢呀？德國都輸得？

今晨舉行嘅多場歐國盃同世界盃外圍賽，要數最大冷門，肯定非德國輸波莫屬！呢支世界盃冠軍喺歐國外D組作客愛爾蘭，雖然全場佔盡優勢，但一直都未能搵到入波辦法，相反，更喺70分鐘畀主隊嘅修咸頓前鋒沙恩朗接應門將生波長傳，喺三名德國守將追纏下，禁區邊右路勁射破網，鎖定1比0勝局。

意外輸波後嘅德國，錯過咗提早出線機會，不過只要佢哋下輪對戰格魯吉亞唔輸波，依然可以殺入出年決賽周。至於爆冷取勝嘅愛爾蘭，亦藉住同組波蘭意外踢和蘇格蘭，保住爭取直接出線機會，下仗愛爾蘭同波蘭交手，兩軍為出線都肯定會打甩髀。