冬季轉會：中超全球燒最多錢！中甲都排第5

冬季轉會市場重開，中國球會連番燒錢買人，據德國著名足球轉會網站《轉會市場》數據顯示，中超目前係全球冬季轉會使最多錢嘅聯賽，足足用咗4,112萬歐元(約3.45億港元)買人，仲多過英超呀！而中甲都以2,310萬歐元(約1.94億港元)排第5，堅有米！

轉會窗重開未夠兩個星期，國內球會已經作出多個收購，最矚目係北京國安由巴甲冠軍哥連泰斯引入聯賽MVP連拿度奧古士圖。經過一輪搶人潮後，中超列強暫時已經用咗超過4,000萬歐元，位列全球No.1，第二位英超只係使咗3,870萬歐元，真係估唔到中超使錢會多過英超.....

仲有呀，中甲球會都用咗超過2,300萬歐元買人，位列全球第5位，投放資金暫時多過西甲、巴甲同英冠等賽事，中國次級聯賽消費力仲大過英格蘭次級聯賽，世界變喇！