港超聯 黃俊皓:希望大家記得我個名!

20160120
東網電視
更多新聞短片
黃俊皓:希望大家記得我個名!
香港人需要真英雄,「英雄輝」的全城爆紅,為香港足球員建立全新「男神package」:從不放棄、捱出彩虹、有經濟效益。精選特餐背後,還有無數A、B、C餐默默打拚,靜待有心人送上掌聲。「唔係要好多人識我,但起碼睇完場波後,希望大家會記得我個名。」作為「英雄輝」身旁的男友人,香港飛馬後衛黃俊皓出道8年低調沉實,年初省港盃才首度入選大港腳。Timeline比人遲,半途發力,仍然有得追。
「13號黃慶燁喺後防踢得幾好,連費蘭度都畀佢爆番轉頭。」香港飛馬早前在聯賽不敵傑志,「13號仔」於球會facebook專頁獲得球迷點名稱讚,不過他的正確名字,是叫黃俊皓,卻被錯點鴛鴦,與隊友馮慶燁「二合為一」。「哈哈,好彩後尾改番。其實我都慣晒,飛馬門將叫袁皓俊,仲有夢想駿其左閘黃梓浩,我哋經常畀人撈亂。」「阿皓」不怒反笑。自幼已在青年隊與葉鴻輝老友鬼鬼,阿皓的起跑線遲來半步,同齡好友紛紛亮相甲組華家堡,他則仍隨香港C隊踢預備組。「從小到大,我都係中間位,唔突出,卻又唔太差。當時大部份隊友都畀甲組球隊選拔,我就要自己周圍敲門試腳。」
轉守為攻求突破
亮相甲組首兩季,「阿皓」已穩站正選,無奈效力的淦源及愉園皆降班收場,加上踢法實而不華,光芒難免被蓋。不上不落,往往最難熬。「如果踢得差冇人要,索性死咗條心轉行。有得踢卻冇乜人留意,其實仲難受。有時都同黃威講笑,點解你受傷冇得踢,大家依然搵你簽名訪問,但就冇人搵我?」笑聲背後難分真假「葡萄」。與其埋怨,「阿皓」選擇自我鞭策:「一係唔好踢,一係再勤力啲,畀大家發現我嘅存在。飛馬今季要度兩閘多上前助攻,自己較以前放膽,不理傳球是否到位也要先上去,不斷逼自己進步。」
省港盃替補入圍,他的名字終被球迷記起-犯規輸掉12碼,卻沒有多少人記得,老友談樂軒的入球,也是源自他的右路策動。「呢場表現唔合格,太緊張喇。不過就算大賽港隊正選唔輪到我,都要努力去爭取做到替補第3人。」不少兒時隊友早已轉考紀律部隊,「阿皓」也曾定下Timeline,想過一、兩年後再無突破便抽身而退,如今卻在迷霧中找到方向:「放棄比留低要更大勇氣,踢波始終係自己最鍾意,點會捨得?」人生是場長途賽,未到終點難知結局,更何況沿途有她:「女朋友與父母差不多每場也入場支持,我都好想畀啲成績佢哋睇。」成績單上的名字,請記住,是叫黃俊皓。
身邊紅人多 「坤哥」係同學
黃俊皓不時遭球迷叫錯名字,他身旁的男友人,卻是星光熠熠,除了識於微時的「英雄輝」,由人肉棋子變身最佳新人的「坤哥」吳業坤,亦是阿皓的同級同學。難怪「阿皓」也笑言,要視「坤哥」為發奮目標。
「阿皓」與葉鴻輝、效力元朗的談樂軒「o靚仔」及因傷掛靴的白榮澤識於微時。「阿輝」如今紅遍全港,與他走在街上,難免惹來注視。「幫Fans揸機影相就一定啦,茶餐廳阿姐仲特別喺佢杯檸茶醒多兩塊檸檬。」儘管際遇有別,卻無損「四人幫」感情。早前「阿皓」與「o靚仔」入選省港盃大軍,「英雄輝」便特往捧場支持老友。「阿皓」笑言不想叼光,偏偏他身邊卻不乏知名男性友人。「舊同學講起先知坤哥以前係讀隔籬班,嗰時佢都係戴黑框眼鏡,但唔知佢識唱歌。」「坤哥」走出迷霧見彩虹,「阿皓」也靜待他的陽光。「『阿輝』同『坤哥』今日得到嘅,係努力換番嚟嘅Bonus,我唔會刻意比較,但都要好好加把勁。」