冬季轉會：繼續癲！英超全季燒過百億破紀錄

歐洲冬季轉會窗悶爆收檔，一向豪爽嘅英超喺收爐前未有送上驚喜，但淨係史篤城、愛華頓同紐卡素等中型班出手，英超已經以1.65億鎊(約18.5億港元)成為冬季「燒錢王」，淨計死線日就使咗4,500萬鎊(約5億港元)，計埋上年夏天，佢哋全季狂燒10億鎊(約112億港元)，再次刷新紀錄！

江蘇新兵拉美利斯冬季標王！

幾支英超富豪球會喺轉會死線前冇聲氣，最終全日最轟動嘅係史篤城用破球會紀錄1,830萬鎊(約2愈港元)簽入波圖中場恩保拿。愛華頓以1,250萬鎊買莫斯科火車頭前鋒奧馬尼亞斯，打入冬季轉會榜第5位，講真，呢兩單轉會都唔多矚目，可見今次轉會窗有幾悶！

今個冬季Top5轉會當中，有2單係來自中國球會，其中江蘇蘇寧以接近2,000萬鎊引入車路士中場拉美利斯，令佢成為冬季標王，可見中資勢力喺世界球壇影響力愈來愈大。

英超係冬季「燒錢王」！

雖然轉會悶到爆，不過英超燒錢能力仍然冠絕全球，喺紐卡素勁使2,850萬鎊(約3.2億港元)撐住下，英超20支球隊喺冬季轉會窗共掟1.65億鎊(約18.5億港元)，壓倒中超成為「燒錢王」。唔講唔知，英超冬窗花錢最多球隊順序係紐卡素、屈福特、諾域治、史篤城、新特蘭同般尼茅夫，真係估你唔到。

至於中超就以1.13億鎊排第2位，拉美利斯去江蘇可以話係今個冬季最矚目轉會，而廣州恒大淘寶將王牌前鋒艾傑臣賣畀上海江港亦夠晒離奇。再睇睇燒錢聯賽榜，連中甲都可以上到第5位，使錢仲多過西甲，人民幣力量真係好勁！

英超全季燒過百億破晒紀錄！

連埋上年夏天在內，英超今季買人開支歷史性突破10億鎊(約112億港元)大關，打破14/15球季嘅9.65億鎊紀錄。《每日郵報》指國際足協下季開始廢除「緊急借用」制度，意味所有球隊需要儲備更多球員應付漫長球季，必令夏季轉會市場熱上加熱，連同英超新嘅天文轉播費入帳，今個夏天肯定非常精彩！

巴利仍然係世界最貴球員！

經過冬季轉會窗後，世界Top10球員榜維持不變，皇馬球星加里夫巴利保持No.1地位，C朗位列第2，現任皇馬教頭施丹排第3。有一點值得留意，自2013年後，Top10球員榜並冇新人上榜，環球經濟轉差，搞到過去兩年幾全球球會消費力轉弱。