「想除你條褲！」阿當莊臣衰十一案情披露

阿當莊臣涉與未成年少女進行性交案，於英國當地時間今日繼續審理。據英媒報道，阿當莊臣以送贈簽名波衫為名，約事發時僅得15歲嘅少女外出，並於佢架車入面首次熱吻、撫摸少女，之後更進行性交。從證供中，得悉阿當莊臣事後傳「真係好正，我想除你條褲」短訊予少女，之後更於網上搜查「法定性交年齡」。

剛被新特蘭解約嘅阿當莊臣，今日繼續由女友陪同下出庭。據英媒透露案情，該名少女係新特蘭忠實球迷，阿當莊臣正正係佢頭號偶像，故經常於主場比賽賽後，於停車場等阿當莊臣。一次少女向阿當莊臣發Facebook朋友邀請，開始和阿當莊臣作網上傾談。

證供指出，阿當莊臣於雙方對話中，清楚知道少女只剛滿15歲，其中一次男方問女方是否出去飲酒，少女稱自己未夠合法年齡，阿當莊臣就話：「但你個樣夠晒大啦！」

於2015年初，阿當莊臣首次約少女外出，當時男方送咗件簽名波衫予少女，少女其後多謝偶像，阿當莊臣話：「以為你會錫我嚟多謝我添！」之後好快雙方有第2次約會，阿當莊臣於車上熱吻少女，並上下其手撫摸，隨後雙方到私人地方進行性交。之後，阿當莊臣曾上網搜查「法定性交年齡」。

事後二人繼續於網上對話，阿當莊臣話：「真係好正，我想除你條褲。」少女之後答：「下次啦！」法官表示，阿當莊臣利用自己喺少女心入面嘅獨有地位，向未成年少女埋手，明顯係錯誤行為。審訊將會於日內繼續。