英超Fever：黑貓都搞唔掂！曼聯又輸1場！

英超早場近期備受前主將阿當莊臣「衰十一」影響嘅新特蘭，今仗知恥近乎勇，雖然紅魔兩番犯手球都逃過被吹12碼嘅大難，但迪基亞卻誤擺烏龍令「黑貓」贏2比1，重燃護級希望。

新特蘭雖然將日前喺法庭承認「與兒童發生性行為」及「兒童性誘拐」罪行嘅翼鋒阿當莊臣炒魷，但形象唔多唔少都受影響，加上依家排下游急需搶分護級，一開波即藉地利發難，僅3分鐘卡斯里於左路禁區邊開出罰球，點知中間冇人掂到個波下反而漏咗入網，領先1比0，25分鐘紅魔中場舒尼達連於自己禁區渉犯手球，但球證睇唔到冇吹罰12碼。大難不死即有後福，39分鐘紅魔中場桑馬達遠射，新特蘭門將文路尼撲出不遠，「新亨利」安東尼馬迪爾即補中扳成1比1。

易邊後曼聯都冇乜起色，49分鐘新特蘭右路開出角球，紅魔隊長朗尼於禁區內被奧沙力壓下擬犯手球，但球證依然視若無睹，紅魔兩次逃過極刑判罰，認真好彩，其後迪科爾近門快射，咁蹺撞到戴利白蘭特出底線。去到82分鐘，迪基亞勇救林米尼干尼頭槌時，卻撞番自己手臂反彈入網，最終輸1比2，令新特蘭護級重現一線生機。