港超聯　黃志聰「遲來的春天」

由義肢工廠工人變身英超神射手領銜李斯特城穩坐榜首，占美華迪完美演繹「有心唔怕遲」的追夢童話。近在香港，東方後衞黃志聰早年在低組別聯賽載浮載沉，每份工也做不長，直至被愛妻當頭棒喝，「廢青」從此堅定人生目標，即使東方人材濟濟，仍能在33歲之齡站穩陣腳。「後生掛住玩，而家更加要追番！」遲來的春天，無奈卻更加可愛。

東方「黑雙塔」基藍馬與法圖斯轉戰中甲，取而代之的正選中堅，並非「90後」的「戰神」曾至孝，而是33歲的黃志聰。26歲才亮相港甲效力淦源，若非妻子Rainbow一席話，如今大概仍在渾噩過日子。「老婆話我份份工都做唔長，與其不務正業何妨一試，如果踢得好，話唔定有大球會賞識！」自幼馳騁屯門街場，「聰頭」曾隨好友郭詠燊到流浪青年軍跟操，卻因「齋跑冇得踢」，不消一個月便放棄。足球？可夢不可想。「千禧初年球市低迷，成日聽人講踢波只得4、5000蚊人工。直至後來球市復甦，計吓條數練完波返吓兼職送外賣，算係捱得過去。到後來屯門升班，咁啱嗰排裝修冇工開再試多次，結果一踢就3年半。」

屯門首場港甲共有半隊球員抽筋，「聰頭」也是其中一分子。多得愛妻鞭策，「排骨仔」練出強勁臂彎，從此遮風擋雨。「比賽後老婆成日問我會畀幾多分自己，我話8分，佢卻要我剩番2分都要攞埋。冇呢個老婆，我諗自己仲係浮浮沉沉。」茫無計劃的人生找到舵手牽引，無奈前路往往意想不到。李明烏龍波疑雲，至今謎團未解，「聰頭」的足球夢幾乎再被粉碎。「好記得我喺後備席睇到『O嘴』！事件發生後球會冇糧出，當時囡囡剛出世，心諗仲唔玩完。點知一個電話救我出火海，真係要多謝東方會長黎同光先生，仲有李思明同姚學文等『救星』。」轉投東方初時，「聰頭」難獲上陣機會，直至該季足總盃決賽後備入替傷出的梁國威，更引得傑志前鋒巴倫古素「兩黃一紅」，成為捧盃功臣。

「細個入大球場睇賀歲盃，喺場邊搵張志德簽名，點估到自己有機會喺大球場捧盃！」機會到來還需好好把握，「聰頭」自知半途出家基本功不足，自動自覺找來陣中年輕隊友一起加操。「大球會要爭位，練波試過畀人撞到飛起，加上季前多咗曾至孝同鄭璟昊等後生仔加盟，佢哋好勤力，我冇理由輸畀班細嘅！」青春揮霍難復返，鼓起勇氣再起飛，仍然及時。

「師承」文仔豪豬 集麥花臣大成

半途出家的黃志聰錯過青訓黃金歲月，全賴街場練得一身好武功，如今退居東方幕後的姚學文、李思明，以及招重文、山度士等「麥花臣球王」紛紛傾囊相授，令他得以「集百家之大成」。

「聰頭」自幼已與文彼得及鄭少偉「亨利」等屯門元朗區街坊「過招」，多得「亨利」介紹他衝出新界踏足麥花臣，方知天外有天。「當時有機會與招重文、陳志光及蔣世豪等前輩組隊參賽，我同『亨利』算係最後生，負責不斷跑動同追波。佢哋幾乎一腳波都冇傳失，真係要寫個服字，雖然我有跟過地區青年隊受訓，但真係呢個時候先至學到點踢波。」

最大本錢滿場飛

不惜氣力奔跑，也在今日成了「聰頭」在東方防線激烈競爭中的最大本錢。季前熱身賽表現落力，獲得前主帥楊正光及「Madam丸」陳婉婷投下信任票。「楊Sir好肯同球員溝通，不時鼓勵我點樣可以做得更好。『牛丸』當時仲係助教，落手落腳幫我哋設計加操內容，自己都估唔到，到咗呢個年紀，仲有空間可以進步。」