港超聯　「農村港仔」方栢倫沉默中爆發

「我想低調沉實。」出自香港飛馬左閘方栢倫口中，似乎有點不可思議。年紀小小已在學界闖出名堂，輕鬆贏在起跑線。雄心壯志闖蕩中甲，曾經自信過人的「學界小志強」，變成「農村來的港仔」，方知天外有天。「以前細個真係會睇唔起人，去完大陸先學識少說話多做事。」自言瞬間長大的「小志強」，決心在沉默中爆發。

「阿媽煮咗我飯，我要早啲返去。」愛癡家的方栢倫，仍保留少年時代幾分純真，曾經自信過人的笑容，卻變得務實謙遜。「以前是是但但冇所謂，開開心心又一日。依家先知道，正選位置係要爭番嚟。」自去年初由中甲歷煉歸來，方栢倫一度淡出球迷視線，直至近仗才於香港飛馬左路再現光芒。「當時受傷未有得到適當治療，返到香港狀態浮浮沉沉。不過而家香港球員北上多咗限制，我可以嘗試過，都算係難得體驗。」

東北人排外 冇波照剷腳

2013年天津東亞運嶄露頭角，為方栢倫與傑志後衞李毅凱贏得瀋陽中澤兩年合約，無奈僅在首季，球隊便遇上易帥、拖糧風波，最終散班收場。曾經比同輩強壯的雙腿，佈滿釘孔傷痕。「東北人比較排外，而且隊友大多年紀相若，難免會因為競爭唔順氣，練波時冇波一樣照剷埋去。」從前口水多過浪花，人在異鄉沉默是金，卻換來隊友嘲笑。「佢哋問我係咪農村人！可能我唔鍾意social，除咗練波就係匿埋宿舍上網睇書，去得最多就係超級市場，所以覺得我另類、唔埋堆。」

發育早大隻過人 反礙進步

縱然未嘗體驗內地潛規則，單是激烈競爭與訓練強度，已讓少年成名的「小志強」，學會天外有天。「細個發育得比較早，單係鬥身形已經恰到人，嗰時真係會睇唔起人，唔諗點去進步，結果停滯不前。去完大陸後，先知道要更加裝備自己，最少要畀教練睇到你有付出，先至有機會。」小伙子瞬間長大。回想小時候曾患過度活躍症，栢倫媽媽為助兒子發泄過人精力，才讓「小志強」接觸足球。「最初真係諗住玩，就算踢到上職業，都係見步行步。但既然球會同屋企人都全力支持，一定要認真去踢。依家嘅我有番目標，最起碼要入選香港隊。」此際的「小志強」，終於重現熟悉的自信笑容。沉默，原來只是爆發的前奏。

---------------

戴志偉　小志強

學界宿敵各奔前程

既有「小志強」，怎可缺少「戴志偉」？少年時代就讀喇沙書院的方栢倫，與男拔好友袁振昇在學界賽事正面交鋒，獲傳媒冠以「喇沙小志強」與「男拔戴志偉」外號。只是「戴志偉」袁振昇早因升學放棄足球，「小志強」方栢倫堅定夢想，卻不忘兼顧學業，為將來未雨綢繆。

成份糧畀晒阿媽儲錢買樓

袁振昇與方栢倫同在地區青苗計劃師承現時香港飛馬教練李志堅，不過有「男拔戴志偉」之稱的「昇仔」，其後到英國升讀大學，回港後投身銀行界，工餘時間為港甲晨曦出戰。「昇仔」早前隨明星足球隊北上踢表演賽，射破前意大利鋼門托度十指關。有球迷惋惜「戴志偉」放棄足球夢，仍與昇仔保持聯絡的栢倫直言，深信人各有志。「佢搵到自己想要生活，我都替佢開心。其實依家足球員薪金，比起唔少大學畢業生還要優厚，只係條路走得唔遠。所以我回港後重新報讀理大兼轉科，起碼將來有保障。」栢倫直言「成份糧畀晒阿媽」，甚至計劃儲錢買樓。23歲便啟動上車血淚史，太早了吧？栢倫卻分析有道：「我都唔出街，日日返屋企食飯，每個月洗唔夠1000蚊。依家嘅我雖然未係最Top一班足球員，但只要肯搏肯試，我信我可以。」