甲一籃球　結婚當入樽！羅意庭5.21小登科

長情，在現今世代、80後90後心目中都未必有這種能耐，對工作是、對興趣是、對感情甚是，處於甚麼都講求即食快速的時代，有幾多人能敢講句自己是癡心長情劍？可幸是，碩果僅全也定必有異數，愛上籃球20年、拍拖13年、打甲一10年，南華後衞羅意庭依然是那個初出道chok住入樽接受訪問的大男孩，28歲的他事業如日方中，從未閃過「轉工」念頭卻早已決定「封盤」，於本月21日與女友勞媛儀（Ar Lo）拉埋天窗，恭喜長情阿庭，輕輕鬆鬆找到幸福的事業和愛情！

Long D仲易維繫

銀牌總決賽阿庭弗爆，三分穿針攻守兼備，24分進帳打出近年代表作，而看台上呢，每場波定必捧場的未婚妻Ar Lo高舉阿庭的大頭紙牌，出晒力吶喊，夫「打」婦隨，發放愛的力量！其實Ar Lo當初對籃球一竅不通，全因唸東華三院伍若瑜夫人紀念中學遇上了阿庭，由一齊食lunch、睇戲、拍拖……「我認識籃球是為了看他（阿庭）比賽，由甚麼都不懂，到現在每逢比賽都會看。」CBA 5年光景，是阿庭事業一個重要階段，「Long D」很難維繫嗎？阿庭唱反調：「那時用facetime、打電話 keep住，放假時上上落落，其實那時正值7年之癢，分隔兩地反而少了磨擦，避開咗。」

戥穿石全是沙煲兄弟

籃球為他建立的，還有真摯的巴打情，8位「戥穿石」全是沙煲兄弟，包括伴郎謝文俊、「南華幫」虞興海、Roy、林凱光；遊協好友潘嘉駿、伍若瑜舊同學鄒健能、葉隆輝及鄭成龍。前南華球員虞興海更是阿庭求婚的「同謀」，前年在布吉兩pair人旅行，早有預謀的阿庭訂了鮮花，最後送上婚戒「得米」，整個過程有巴打幫手，事後他們還在別墅的天台遙望星空共享浪漫晚餐，阿庭形容自己是「鐵漢柔情」，對著他眼中「漂亮、皮膚好、孝順、事事體諒」自己的女友，平日在籃球場上要辣、要狠的他，也變得柔情起來。伴郎謝文俊送上祝福：「好開心阿庭同Ar Lo結婚，由我識佢，佢哋已經一齊，10幾年好難得。接新娘時會為佢『頂』晒啲遊戲，收到風姊妹團會就住嚟，要幾多下掌上壓都冇問題！」

無論在事業還是愛情路上，羅意庭都堅定向着一個目標「進發」，結婚當入樽，對長情的阿庭來說，當然輕鬆啦！究竟一對準新人有幾夾幾了解？特別出了10條愛妻問答考考準新郎哥，想不到他全部都……

問：你同Ar Lo的拍拖紀念日係？

答：11月5日　對　答啱

問：兩人第1次約會嘅地方?

答：戲院，看《古宅心慌慌》，有方中信、Twins…… 　對　答得好詳細

問：吃中菜時，Ar Lo必叫菜式是?

答：菠蘿咕嚕肉　對

問：Ar Lo最嚮往嘅國家?

答：南韓　對　唔怪得去南韓影婚紗相啦

問：Ar Lo最怕咩昆蟲？

答：曱甴 　對

問：女友最崇拜嘅人?

答：我囉！　 對

問：如果新居要揀張新梳化，女友會揀咩顏色？

答：深色系列　對

問：Ar Lo着幾多號鞋？

答：5號半　對　5號或5號半都啱

問：女友喜歡嘅歌手?

答：應該係容祖兒　對

問：Ar Lo唔食乜嘢?

答：芫荽　對　快而準

簡單的問答，全部難不過阿庭，全中呀！