港超聯　林志堅：目標代表香港征戰世盃

林志堅回港發展，但對自己要求絕不降低，佢同傑志教練朱志光見面，第一件事就係研究操練量，希望能夠保持喺德國球會嘅高強度。「我希望用自己嘅德甲經驗幫助球隊，而且渴望將來能夠代表香港參加世界盃比賽。」朱志光表示盡速同佢辦工作證，並爭取以本地球員身分踢新一屆港超聯。

林志堅加盟後，揀咗6號為球衣「冧把」，並會擔任中場位置，傑志目前中場線已經有林柱機、林恩許同林嘉緯，加埋林志堅，「林氏四傑」打造黃金中場，令人期待！朱志光稱：「我花咗好多時間睇佢喺德國嘅比賽片，會畀佢喺中場盡情發揮，傑志嘅組織性踢法絕對啱晒佢！」林志堅昨晚已離港返回德國，但會趕返嚟參加傑志13號開操，為咗畀新舊球員更多時間磨合，傑志計劃下月1日拉隊赴南韓進行季前集訓。