港超聯　梁守志：我哋唔會咁易散！

應屆港超冠軍東方新球季面臨遽變，入主3季的商人會長黎同光突然辭任，令會方頓失財政支柱，來季或需改組中型班。總監梁守志強調，會努力物色新贊助及協助職球員，「唔會畀東方咁易散」，創造女帥首度稱霸男子頂級聯賽歷史的陳婉婷(牛丸)，以及應屆香港足球先生葉鴻輝，均已承諾無條件留隊，誓與東方共度難關。

關於東方來季組軍動向，近日球圈傳聞四起。總監梁守志周一(18日)早上，會見教練團及球員，下午隨即舉行臨時記者會交代近況，他表示因與會長黎同光意見分歧，對方在上周六(16日)突然決定辭任，令球隊頓失方寸。自東方2013年重返頂級聯賽後，黎同光每季投資超過2000萬港元，去年更成立首支職業籃球隊。在失去其主要財政支持下，球員勢面臨大幅降薪，新簽入的西甲伊巴前鋒阿路巴連拿，日前到埗後才驚悉噩耗，獲補足賠償後即時解約。據悉梁守志會見職球員時難忍淚光，並保證「唔會畀東方咁易散」，在下午記者會即回復一貫硬朗姿態，多番強調「地球係圓，路還要繼續走」。他表示：「唔會輕易放棄球員，係我一直以嚟搞波宗旨，你哋(傳媒)仲好似驚過我，無論如何東方仍會續戰港超，一定唔會降班包尾。」

梁守志重申仍會努力物色贊助，但考慮到難以負擔出戰亞洲賽的經費，已向香港足總申請棄權，目前所有足球與籃球部職球員均有約在身，如有新加盟球員因未能出戰亞洲賽而欲離隊，會方將無條件解約。除傳聞月薪高達6位數的阿路巴拿連，東方今月宣布羅致的，還有港腳麥基、梁振邦及澳洲中堅米曹。據消息稱，麥基或有機會重返香港飛馬。梁守志未有透露東方目前班費，但強調會方財政正常及「出足糧」。

東方足球隊近20年經歷「三起三落」，1990年代在李健和、譚兆偉及基亞等名將助陣下，連續3年稱霸港甲締造王朝，惟於1995至96年改造青春班，翌季聯賽包尾降落乙組。直至2007年獲足總邀請出戰港甲，東方在主帥米路帶領下贏得銀牌錦標，惟翌季宣布自降丙組。2013年以千萬大軍姿態升班再戰頂級聯賽，至今先後獲得1次足總盃及2次銀牌，去季更在港超力壓傑志封王。

SO東波同你追實體壇每個精彩時刻！　

http://on.fb.me/1PWMCFH