【里約奧運】撐孫楊！中國網民罷買澳洲奶粉

澳洲泳手賀頓諷刺孫楊食禁藥的風波愈鬧愈大，內地網民不單止翻牆進攻賀頓Instagram帳戶，亦話如賀頓和澳洲唔道歉，要罷買奶粉等澳洲貨。

中國網民所講嘅澳洲貨，原來都幾多樣化，有人將矛頭指向在澳洲創立、總部設於英國的泳裝生產商Speedo，有網民話：「要不要抵制他們？看在他們也贊助中國選手的份上，應該提出讓他們踢走賀頓，如果拒絕，就應該抵制到底。」但事實上間公司雖然為澳洲人創立，但其實早於90年代已被英國一間運動品牌集團所收購。

另有網民更劍指澳洲奶粉，有人說：「賀頓向孫楊道歉道歉！不道歉，國人一起抵制澳洲奶粉，抵制澳洲商品。」有人仲話要將奶粉掟入垃圾桶，又話喺超市偷偷喺奶粉入面注入咗幾斤面粉。佢哋就連澳洲肥牛都唔放過，話只要中國人一個月唔食澳洲肥牛，澳洲一半靠牛為生的人將面臨失業，只要中國人一年唔食，澳洲將全國滅亡咁話。網民咁大口氣抵制澳洲的同時，卻有人發現，孫楊本身也是在澳洲接受游泳訓練，他與當地優秀教練合作，咁唔通啫係成也澳洲，敗也澳洲？