【奧運直擊】等足12年！中國女排反勝奪金
20160821
東網電視
更多新聞短片
惠若琪(右圖)帶領中國女排歷來第3次奪得奧運金牌。
中國女排喺里約奧運女排決賽以3:1擊敗塞爾維亞女排，被看淡下發揮女排精神同中國長城力量完成冠軍任務，唔止繼1984年洛杉磯奧運同2004年雅典奧運後，史上第3次奪得金牌，仲係教練郎平3次帶隊入奧運決賽，首次奪金而回！
中國女排教練郎平安排袁心玥同徐雲麗同時正選上陣，希望以高度對抗塞爾維亞女排嘅強攻，原本喺第1局有唔錯發揮，可惜中段開始抵擋唔住對手嘅強力發球同重扣，分數逐漸被拉開，結果以19:25先輸1局。
第2局中國女排把握對手初段接連犯錯，開始搶番優勢，加上袁心玥嘅攔網同朱婷嘅強攻都有好表現，成功以25:17扳平局數。進入第3局，塞爾維亞女排繼續有唔少失誤，加上惠若琪連番攔網直接得分，造就中國女排以25:22反超前局數。
打到第4局，雙方分數咬得比較緊，不過中國女排後上氣勢始終比較強勁，打到比賽中段一直領先，而且徐雲麗快攻連番得手，即使尾段又被對手追上，依然靠惠若琪埋齋以25:23贏波，報番分組賽慘負0:3之仇，相隔12年再奪奧運金牌。
SO東波同你追實體壇每個精彩時刻！