東網電視
更多新聞短片
隊長的承擔！基斯贊（左）與佐迪。
做男人，最緊要有承擔，特別係作為一隊之首嘅leader級男人。
相隔唔夠一個月，理文流浪與香港飛馬就喺高級組銀牌（周六）再度交鋒。同首輪聯賽打和1:1不遑多讓，今次踢埋加時，依然互無紀錄，最後都係要以最殘酷嘅方式，互射12碼決勝負。
戴上理文流浪隊長臂章嘅佐迪，縱橫香港球壇6年，入波易過食生菜，點知第一輪主射嘅佢，就被呢日28歲生日嘅壽星仔基斯贊救出。雖然理文流浪門將「肥邱」邱于銘都好叻豬救出艾華度射門，但基斯贊之後救多一球，加上流浪小將黃梓浩喺突然死亡階段炒高，結果香港飛馬以4:3贏波晉級。
兩個隊長，兩個結局，卻有着同一承擔。
「救波係守門員嘅職責，或者因為今日係我生日，上天特別眷顧我，贏波就係最好嘅生日禮物。」香港飛馬隊友同球迷好識做，賽後送上香檳同唱生日歌為「Kiko」慶祝，不過呢位馬其頓門神依然拒絕邀功。回帶去番上季尾，香港飛馬接連勇闖足總盃及菁英盃決賽，結果同樣要踢到互射12碼先決出王者誰屬，同今日一樣，都係多得基斯贊連番神救，令到香港飛馬可以連奪兩盃。一次就話係運氣使然，接二連三，自然係有賴日子有功，觀察對手射門習慣累積而成。
常說10個龍門9個癲，喺龍門口「癲」起上嚟嘅Kiko，的確嚇窒唔少前鋒殺手，不過正正係呢份投入同激情，令到整體較為年輕嘅香港飛馬變得穩陣，仲因此為Kiko換嚟隊長重任。「當球會決定由我出任隊長時，的確幾意外，畢竟以喺香港資歷來講，好多球員比我更有資格，所以我更加要做好榜樣。我嘅位置需要成日提場，特別係香港飛馬今季變動較多，更加要出多啲聲加強溝通。」
有別基斯贊激情四射，今季由傑志外借到理文流浪嘅佐迪，向來以冷靜見稱，咁多年嚟都冇乜見過佢發脾氣，甚至係向球證投訴。但係冷靜唔代表冇火，就算喺香港幾乎乜盃都攞過，「Uncle Jordi」仍然有所求。呢兩場對住香港飛馬，佐迪除咗要喺前線肩負入波重任，仲要不時回防攞波，35歲踢足120分鐘走上走落，問到「Uncle Jordi」會否好辛苦，佢就第一時間Say No: 「如果我話踢得辛苦，對其他隊友好唔公平，因為我相信一班年輕人跑得比我更多。當我外借過嚟流浪時，就知道協助呢班年輕球員成長，比起入波更加重要。可惜今次竟然係我第一個射失12碼.......但係足球就是這樣的，相信大家都上咗重要一課，以流浪呢班年輕球員勇於學習心態，相信球隊亦會愈走愈好。」
相比起初來香港之時，而家嘅Uncle Jordi增添了幾絲白頭髮，卻也多了扶攜後輩嘅領袖魅力。當22歲嘅「王子」12碼宴客後，就係佐迪第一時間上前安慰。哪怕角色場地轉換，有一種態度，叫敬業樂業，卻始終如一。(文：++姐）
