【我有嘢講】楊賜麟為家人及標準灝天重生

真愛魔力可以有幾大？由遊戲人間的「賜B」到淡定抱仔的「爸B」，剛為人父的標準灝天隊長楊賜麟判若兩人:「以前玩到醉晒先返去瞓，而家先至識得認真面對自己職業。」曾經嘻嘻哈哈爛醉街頭，恍恍惚惚走到月薪6000的人生交叉點，方知時光不留人，多得妻子Marble牽引，迷途浪子終知返。上帝早已預備，轉身重拾人生目標，永未會遲。

「BB剛出世時係咁喊，初初覺得好得意，但好快就要諗點樣養大佢。」抱着出生僅兩周的兒子景桓，已成「爸B」的楊賜麟手勢純熟，絲毫不像平時嘻皮笑臉的「賜B」。「佢對小動物同小朋友好有愛心，每日練完波返嚟都幫手湊B，換片餵奶已經難佢唔倒！」看着妻子Marble投以讚賞目光，「賜B」感恩良緣天注定。「有時真係好似整定，識咗老婆2、3個月，佢就提我要儲錢為將來打算。咁啱身邊唔少朋友籌備結婚，父母年紀亦開始大，自己都係時候要醒。」闖蕩球圈8載，出道初年的「賜B」備受看好，這些年載浮載沉，全因一個「Hea」字斷送光陰。「細個覺得仲有大把時間，飲飽食醉掛住玩，飲到第2日冇精神練波，諗番都覺得辛苦。特別係加盟黃大仙頭半季遇上感情問題，踢落去又唔起勁，起身已經練完波，唔止身邊人對我半放棄，我亦差唔多放棄咗自己。」

多謝招Sir尹東憲鞭策

對的時間遇見對的人，谷底之中未被遺棄，除了命中注定的她出手牽引，還幸良師益友從旁點醒。去季初因球會財困被減薪至只得6000元，久遺的鬥志竟被燃起。「招Sir(標準灝天教練招重文)半鬧半氹引導我，加上黑仔(王景華)、聲仔(傅樹聲)等黃大仙升班功臣，本身可以做番自己工作收入穩定，為咗夢想依然笑住捱落去，當堂覺得好慚愧。」難得清醒不再賣醉，重拾目標的「賜B」兼職教波幫補家計，季中回復「正常」薪金水平，咬緊牙關轉個彎，前路風光更明媚。「韓援尹東憲同我講Kim Sir(港隊教練金判坤)有留意我表現，初初我都係聽下就算，點知Kim Sir季前曾喺熱身賽後同我握手，叫我改善紀律同態度，仲話會考慮畀我喺港隊試下。而家只要練波有少少唔集中，尹東憲都會用廣東話激勵我，畀佢同招Sir日哦夜哦，自己都希望，有朝一日真係可以入到港隊。」

時光不留人，眼看昔日奧運隊隊友有的提早離場，有的投身大球會，一度迷惘的「賜B」終學會珍惜當下，縱然無緣下月港澳埠際賽名單，上輪聯賽為標準灝天射入靚波，足已證明隊長臂章的價值。「我就快27歲，喺陣中華將之間差唔多已係年紀最大，要學識照顧人，唔再好似以前要畀人照顧。做咗爸爸更加要有責任感，畀囝囝學埋我啲衰嘢點算?」嘻嘻哈哈笑聲依舊，卻多了男人該有的承擔。

踢5人賽用腦幫助第二春

少年成名的楊賜麟未嘗入選大港腳，近年位置更愈打愈後，他的細膩技術卻深得5人足球發展經理曾偉忠(招積)青睞，更從5人足球發掘「食腦」樂趣，有助重覓場上第二春。

1989年出生的「賜B」曾是奧運隊主力，前鋒出身的他因當時奧運隊缺乏中堅，被迫與同樣愈打愈後的曾錦濤合作扼守中路，近年又轉型踢閘，除了門將幾乎所有位置也試過。回想同齡隊友際遇各異，慶幸未被淘汰的「賜B」拒絕歸咎近年入籍兵影響本地球員發展，反而從5人足球啟發新思維。「最初我都唔識踢5人足球，直至有場對澳門入咗3球，當堂啲火返晒嚟！5人足球比起11人足球更要識得用腦同夠快。呢幾年隨5人隊出外比賽，見到唔少外國球隊都將5人足球戰術發揮落11人足球，但係香港依然意識一般，自己都想將所學知識融匯貫通。」「賜B」近季的美妙助攻與入球不時「估佢唔到」，難怪他的恩師兼標準灝天教練招重文也笑言：「天才係要有少少癡線先識踢波。」