【第12人】曾昭達：大家叫番我達仔得喇

年輕，不代表勇武。年僅27歲的曾昭達今季接過九巴元朗帥印，成為港超最年輕教練，陷於落後劣勢仍能冷靜調動，甚至安撫正為球證判決怒火中燒、比自己年長12年的隊長法比奧。「教練做得唔好，球隊都會跟住唔好，唔可以唔成熟。」短短4個月，由「達仔」變「達Sir」的他瞬間長大。教練目標比預期Timeline早到，球員生涯發展一般的「達Sir」努力裝備：「踢波唔叻一樣可以貢獻香港足球」。

「大家叫番我達仔得喇。」角色轉換，面對去季仍在並肩作戰的舊隊友，曾昭達仍保持謙卑。即使那身學院派恤衫Look新打扮，曾被口痕網民揶揄「細路扮大人」，九巴元朗季初的不俗戰績與頭頭是道的漂亮組織，足已為「達Sir」的教練路注下強心針:「當王威信會長大膽問我有冇勇氣去接受挑戰時，我都考慮咗2、3日，一來擔心成績壓力，亦怕球員未必相信我。好彩球會上下對我全力支持，畀咗好大自由度，同球員有傾有講說明要求，始終球隊要互信先可以踢好波。」

「達Sir」曾想過有朝一日執教球會，但目標是在30歲後。回想當初獲母校體藝中學邀請執教校隊，只得18歲的「達仔」便報考亞洲足協教練牌照，場外比歐陽耀冲、曾錦濤等同齡隊友走快半步，場上成就卻漸被拋離。現實與理想總是兩難存，有人選擇離場，他卻主動求變，考入城大會計系邊讀邊踢，早為未來謀後路：「呢一刻際遇唔好，唔代表以後都係，最緊要好好裝備，把握機會嘗試改變。嗰時球市唔好人工唔高，惟有諗方法平衡生活同興趣。後來轉投甲組油尖旺，為補生計試過身兼3份教職，睇住一班青年球員慢慢進步，逐漸開始Enjoy教波樂趣。」

球員年代無憂無慮，擔起教職卻要時刻問責，曾經傲視同儕如莫連奴，也有英雄落魄時。「達Sir」深明壓力，直言「每場比賽都係決賽」，縱然留戀踢波的日子，但仍無悔當初:「唔係覺得自己好似大咗10年咁簡單，而係教練呢份工作需要你去大個10年。但既然揀咗就唔會返轉頭。」從前操練過後便可回家抱頭大睡，如今從安排訓練時間、剪片部署、向球員分析講解，腦筋轉個不停，難怪短短4個月已添了不少白頭髮。「達Sir」慶幸相戀7年的女友Joey體諒支持，還有良師益友拔刀襄助:「多謝兩位助教陳文俊同梁卓長幫手，佢哋經驗比我好，可以用長輩形式同球員溝通。球隊成績好係因為球員，因為落場嘅係佢哋，但係球員踢得唔好，我都有責任，因為係教練決定畀佢落場。」

訪問中，「達Sir」提過很多名字，還特別感激球員場場搏盡，拒做「You always agree」的「Boss」：「我希望能當個帶動團隊一起達標的『Leader』，唔係只用口頭指點嘅『Boss』。喺我心目中好教練要將心比己唔擺款，不論華人外援都願意團結賣命，馮Sir（馮凱文）喺呢方面令我領會最深。同時亦要準備充足，畀到說服力球員，好似陳Sir(陳曉明)除咗有自己一套戰術風格，仲可以清晰表達。」

在外國名帥中，「達Sir」最欣賞激情與戰術理念兼備的高普及哥迪奧拿，雖然開季至今仍保持冷靜作風，但他深信「踢波唔可以冇激情」。不過說到九巴元朗今季擅用的地面組織及快速反擊戰術，則是沿自恩師陳曉明啟發：「本地球員可以用腦筋彌補身型不足。我哋嗰代由細被灌輸擅用地波組織，無奈華家堡散班後，大家各散東西。畢竟依家香港球壇比較偏重入籍兵，教練有責任帶番多啲華將出嚟，只要搵啱踢法，本地球員一樣得嘅。」一直不慍不火的「達Sir」，說來雙眼發亮；換個方式圓夢，同樣海闊天空。