【我有嘢講】扭扭昌10年頓悟：寧可做配角

3屆視帝黎耀祥，香港觀眾無人不識；「牛奶仔」黎永昌，老一輩球迷仍然津津樂道。黎耀昌是誰？兩周前外借倒戈南華如同球王上身，職業生涯首次梅開二度，facebook洗版效應一時無兩。10年綠葉翻身變主角，理應吐氣揚眉，「阿昌」卻雲淡風輕：「我從來唔覺得自己唔抵，與其畀人捧到名大於實，我寧願做番實大於名嘅小配角。」大智若愚，終可後發先至。

一個金球引來瘋狂洗版，更令冷落他的前任南華看守教練列卡度「一燉再燉」，即使未有入選東亞足球錦標賽的港隊名單，黎耀昌，毫無疑問是這陣子最多球迷討論的名字。倒戈入波，其實對「阿昌」而言並非新鮮事，早在效力天水圍飛馬首季，便曾在香港大球場離門40碼轟破母會流浪大門。「當時冇直播，本地波亦冇乜人睇，講番起都冇人記得。」

花無百日紅，不經不覺縱橫球圈10年，「阿昌」自然心領神會：「我唔想再喺Rambo(列卡度)傷口上灑鹽，佢有佢嘅難處，球圈始終好現實。由出道到而家，我都未試過突然有咁多人留意，但只要我下場踢得唔好，又可能會話我只踢得1、2場好波。讚美聲音好易令人沖昏頭腦，我寧願大家繼續批評我。」

鵪鶉仔兒時夢想做Sales

自幼已在摩士公園扭遍街場無敵手，小學對手更要找來專人「招呼」，明明可以自信過人，他卻偏偏戰戰兢兢，就連兒時夢想也只是做Sales（售貨員）！沒有志氣？他卻另有想法：「做Sales好失禮咩？我相信以我口才，一樣可以做到Top Sales。我算容易滿足，外界覺得我十幾年嚟浮浮沉沉，但我從來唔覺得自己唔抵，只係表現唔夠穩定。」初出道的黎耀昌不算一鳴驚人，但逢人扭人的過人膽識，亦曾覓得知音人，一次預備組賽事連扭幾關技驚四座，獲得當時的天水圍飛馬招手。「其實嗰時已有機會踢南華，但唔少人擔心我當時只得19歲，太後生應付唔到壓力，而且始終係街波出身，戰術意識係爭啲，好彩嘅係我遇過唔少教練都樂意指導糾正，好似理文流浪兩位教練(馮凱文與林慶麟)鼓勵地面進攻，就算偶有失誤亦鼓勵我哋建立風格。」

「阿昌」自言是幸運一群，2009年東亞運金牌創造傳奇一刻，他也是成員之一，即使只曾後備上陣20分鐘。無奈逾半隊友早已淡出球圈，被視作年輕球員多年的他，今年亦已28歲，說他大器晚成，不如說是心態決定命運：「初入球圈已有唔少人叫我轉行，我自己都有諗過，畢竟盃又捧過，球會散班又試過，踢嚟踢去都踢唔到上一線，我畀過最後時限自己，不過當年喺黃大仙表現唔錯，當時人工唔算高，惟有教波幫補，後來仲畀南華賞識。追夢同生活要平衡，你踢到幾多，人哋就畀幾多你，選擇咗就唔好埋怨。」

知足常樂，表面「冇乜所謂」的阿昌，曾入以選香港隊為目標，惟自2010年亞洲盃外圍賽後，便未嘗再披港隊戰衣，即使效力黃大仙期間曾獲重召，但未嘗操練便被剔出決選名單。有說入籍猛將剝削「本土派」機會，阿昌淡然以對:「入籍球員的確係有幫助，想入選惟有踢得比辛祖同艾力士更好。」

怨天尤人與圖強自決，「阿昌」選擇了後者，季初主動向南華提出外借，重返母會理文流浪。10年人事幾番新，理文流浪今季換上新氣象，「阿昌」亦不再是當日在朋友三催四請才敢投考青年軍的「鵪鶉仔」，不時以身作則鼓勵年輕隊友。「贏南華賽後收到好多message，最難忘係偶像兼老友李康廉提醒我要謙卑。依家嘅我有少少變咗，唔係因為得咗，而係對自己更加有要求，練波時應玩則玩，唔再好似以前成日嘻嘻哈哈。」不變的，是他那10年如一日的不修邊幅髮型：「踢波唔係睇造型，啱自己嘅就唔好變」，「阿昌」自辯說。找對定位不猶豫，方可覓得新出路。