【長江後浪】中國U10角球戰術勁過曼聯！

中國國家隊搵到納比執教，令球迷對國足未來重燃一絲希望，事實上，中國一班明日之星原來都好有潛質，至少喺角球戰術上落咗唔少心思，連英國傳媒都專登去報道添！

今個月初一場中國10歲以下級別賽事，上海博擊以5比0大勝上海經典，當中2個入球就係利用角球戰術所入。第1球博擊隊開出角球後，走前柱球員作勢接應後大步跨過，漏畀後面隊友狂抽破網；第2球就相當蠱惑，一名球員扮晒嘢叫隊友開角球，但換人前就細細力將個波踢出角球線，接應隊友即時突襲送去龍門口畀隊友射入。唔少國內網友，睇到呢段片都驚為天人，認為呢班小將好有潛質，教練又有料到，話不如派佢哋代表國家去爭世界盃決賽周入場券，都好過搵依家班國足！

英國《太陽報》報道呢單新聞嗰陣，仲話曼聯喺2009年都用過呢個戰術，不過朗尼同傑斯就未能成功，依家反而由呢班中國U10小將做到，你話係咪威水先？

東網體育同你追實體壇每個精彩時刻！