歐聯　16強解籤　阿仙奴21.7%鬥皇馬

歐聯分組賽曲終人散，16強首次名球隊亦全部誕生，由於皇家馬德里今晨喺F組被多蒙特逼和，只能以次名身份出線，令到首名同次名球隊份量非常均等，星期一嘅抽籤勢必出現多場重量級戲碼，當中「難得」拎到首名出線嘅阿仙奴，好大機會繼續佢哋嘅下下籤惡夢，有差唔多4成機會抽中對皇家馬德里或拜仁慕尼黑。

睇番今屆16強球隊，皇家馬德里、拜仁慕尼黑、曼城同巴黎聖日耳門等超級豪門，都只能夠以次名出線，由於同組以及同地區球隊唔會喺16強對壘，所以唔少球隊可以抽中嘅對手會較少，有網站立即計算出各支球隊抽中對手嘅機會率，唔少超級大戰都有較大機會出現。

以A組首名阿仙奴為例，佢哋16強唔會對住同組嘅巴黎聖日耳門，亦唔會抽中同樣嚟自英超嘅曼城，即係佢哋只有6個潛在對手，當中皇家馬德里亦排除對巴塞隆拿、馬德里體育會同多蒙特，意味皇馬只有5個潛在對手，所以統計顯示阿仙奴有21.737%會對皇馬，機會高過晒其餘5個可能對手。

想睇豪門大戰好戲嘅球迷應該唔會失望，因為統計仲顯示，巴塞隆拿有22.479%機會鬥拜仁慕尼黑，曼城對馬德里體育會(25.364%)或者多蒙特(24.250%)亦屬於「超高機會」，今屆歐聯真係好睇過戲。

首名出線：

阿仙奴(英)、馬德里體育會(西)、巴塞隆拿(西)、多蒙特(德)、祖雲達斯(意)、李斯特城(英)、摩納哥(法)、拿玻里(意)

次名出線：

皇家馬德里(西)、賓菲加(葡)、波圖(葡)、西維爾(西)、利華古遜(德)、拜仁慕尼黑(德)、曼城(英)、巴黎聖日耳門(法)

東網體育同你追實體壇每個精彩時刻！　

http://bit.ly/2ecTF2A