【我有嘢講】唔係猛龍唔過江！澳門足球先生梁嘉恆

每次搭船到澳門，也許你和我也曾發過同一個夢：「賭神」上身大殺四方，「滿載而歸」從此無憂。來自澳門的梁嘉恆，夢想成為職業足球員，曾經同樣遙不可及：「澳門環境太細，我哋唔係冇夢想，只係好快就被現實打沉。」2014年決心「過大海」圓夢，雄心未展卻被傷病擊倒；今季轉投香港飛馬，射破南華取得首個港超入球。用命運作賭注，除了運氣，還要腳踏實地去打拚。

「好多隊友冇諗過會出到線，只係請咗10日假，入到4強先至再請過。」似曾相識的電影情節，出現在去年11月的亞洲足協團結盃，澳門爆冷勇闖決賽，即使僅得亞軍，已為梁嘉恆帶來賽事最佳球員榮譽。只是除了他，澳門隊的球員也有正職在身。「隊友大部份都係紀律部隊。其實澳門打工唔止得賭場，普遍年輕人都想做政府工，始終福利好夠穩定。」

人口只得60萬的澳門華燈影照、遊客不斷，卻走不出產業單一的迷局。在父母要求下，「嘉恆」順利完成大學學位，當初選擇傳播學系，只因「好多朋友揀呢科」，說到最愛的足球，還是敢夢不敢想。「16歲喺U19亞青賽入咗6球，開始諗過要做職業球員，可惜澳門冇職業聯賽，唔少教練都覺得由香港開始係最好選擇。南華曾經向我招手，但當時我仲係中學生，覺得好驚唔敢去試。後來到大埔搵我又斷腳重傷，輾轉去到大學最後一年，先至有機會正式圓夢。」

讀大學早退赴轉會記招

習慣香港的人來人往，「嘉恆」難得重返位於橫琴島的澳門大學，享受久違了的寧靜，不禁想起轉會當日還在上課，要向教授申請早退趕赴記招，惹得同學歡呼聲四起。「其實唔少澳門運動員朋友都有夢想，好可惜因為生活而要放棄。好似足球員要外闖，除咗因為外援名額，待遇條件亦係考慮因素，未必個個屋企可以負擔得到。」加盟大埔首季只曾正選上陣3次，「嘉恆」大部分人工已用作穿梳港澳的交通費，全靠家人默默支持。「有段時候要問屋企攞錢幫補生活，諗番都唔好意思。父母希望我完成學位有保障，試過朝早練完波返澳門上堂，夜晚又要為澳門備戰國際賽，有一剎那真係好想放棄。」倔強冒險去征討，身體卻超出負荷。一次練習受傷休息3個月，反而因禍得福。「如果唔係養傷，我諗冇咁快可以畢到業！既然練唔到波，惟有做GYM鍛鍊上身肌肉，成間大學我去得最多就係GYM房，以前嘅我實在太瘦喇！」

除了健身室，大學校園還有保養得宜的真草足球場，筆者正想讚嘆設備比起香港還要齊全，「嘉恆」卻說：「其實全澳門只得4個真草場，我細個係踢沙地，要着『白飯魚』先唔會跣親。」政府每年派錢，亦彌補不了先天環境限制，「嘉恆」卻從沒埋怨生於澳門。「講起澳門足球，外界好自然第一時間諗起個輸字，當初嚟香港落班，也有聽過質疑聲音。人哋點睇唔緊要，最緊要係自己爭氣，我都希望可以做到榜樣，讓更多澳門球員勇敢嘗試。」隨於上月轉為本地球員，「嘉恆」上陣機會漸多，轟破南華的關鍵入球，總算撥開雲霧見彩虹：「夢想係要用行動去實現，有得試點都試咗先，唔好得個講字。」無盡旅途可以走得多遠？「嘉恆」先定下兩年目標，看看能否向外再闖，難得夢一場，革命不老。更何況24歲的「嘉恆」，還有青春當本錢。

澳門創佳績靠HK猛人

澳門於去年11月的亞洲足協團結盃決賽僅負尼泊爾，創下近年國際賽最佳成績，背後亦有賴香港猛將出謀獻策。澳門足總去年邀得「智多星」郭家明出任技術顧問，現為亞洲足協教練導師的陳曉明則擔任技術總監，協助澳門足球走出枯井。

澳門隊近年曾在國際足協排名跌至201位，身為兩屆澳門足球先生的梁嘉恆也直言往往「未打先認輸」:「以前練波成日唔夠人，出到去比賽好易跟咗對手節奏，踢得好辛苦。」澳門隊早年由香港名將梁帥榮執教，將只得16歲的「嘉恆」擢升上一隊，曾培訓不少本地教練的陳曉明去年轉戰澳門，亦令「嘉恆」獲益不少:「踢波冇人會想輸，陳Sir主要幫我哋調整心理。又會逐個調整番場上企位。」香港聯賽一向重用外援前鋒，13歲才正式受訓的「嘉恆」，深知競爭不易。可幸香港飛馬今季兩位外籍教練，也向他細心施教：「前主帥加倫有話我『得身位』唔夠好，成日同我加操練習；奇雲邦特則多做逼搶。自己身形面對外援中堅難免吃力，惟有強化多跑動優點彌補。」