【轉會Go！】祖維迪被外借至西維爾
20170110
東網電視
更多新聞短片
國際米蘭在新帥皮奧利的率領下取得4連勝，重回聯賽爭奪歐聯席位嘅行列。不過，喺新帥上任後，唔少國米老臣子並未獲得重用，引起部分球員不滿，好像巴西中場菲臘比美路已被球隊送走，如今離隊名單再加上黑山前鋒祖維迪。
祖維迪曾經就未能獲得上陣機會喺接受訪問時公開表示不滿，導致佢自己畀國米罰錢。據意大利多家媒體報道，國米已經同西維爾就祖維迪外借加盟達成共識，呢位黑山前鋒下半季將外借至西維爾，而西維爾喺嚟緊夏天可以1,400萬歐元（約1.15億港元）買斷。據報有中超球隊曾經希望收購呢位前曼城球員，但最終仍由西維爾笑到最後。
據了解，西維爾需要承擔祖維迪全部350萬歐元（約2,874萬港元）嘅年薪，但如果西維爾選擇喺今個夏天以1,400萬歐元買斷呢位黑山前鋒，將會同祖維迪簽另一張新合約。
東網體育同你追實體壇每個精彩時刻！